Psa 141 | HUI | STEP | Anduane Homogo-o i̱na í̠ olarogo áyu ogoniore i̱ biamogo bibe. I̱na í̠ olalu kogola í̠na i̱naga bi haleore habe.

b 141.3Iba 34.13, Ya 1.26, 3.8

c 141.4Min 23.6

d 141.82 Bit 20.12, Iba 25.15, 123.1-2

Psalms 141

Mbiraga Anduane Homogohondo bi lenego ogo

1 Anduane Homogo-o i̱na í̠ olarogo áyu ogoniore i̱ biamogo bibe.
I̱na í̠ olalu kogola í̠na i̱naga bi haleore habe.
2 I̱naga bi í̠hondo larogoni ira hagua ngabi miniinisenesinaga hagua irigi haragola ^a
nga halu turu harilidagua turu halu hale habe.
Mbiraga í̠hondo mbirale lomabu delene yamirilidagua
i̱naga gi yaraga halu í̠hondo bi larogo yamibe.

3 Anduane Homogo-o i̱naga ne hariga howa bi latagi haroru mamage habe. ^b
I̱naga ne hambuni bi loleberoru damene handayaho habe.
4 Mana ko ngago bulenaga i̱naga bu miniha heyuligo mamage habe.
Wali agali ko biaga karume mana ko biradagua
i̱ ti heba howa ko biamaga halu holigo i̱ nahelabe.
Ti dawe halu tomo nalu bedagoha
i̱ ti heba mandagi naberelabe. ^c

5 Wali agali mini tigabi kagome i̱ dara howa mo tiga bialu
pani ngiyagua nde ogoni karulape.
Wali agali ko karume i̱naga mini yaraga holene manda biyagua i̱ mangaba lolebero.
Irane i̱na í̠hondo lalu wali agali ko karume ko biyagonaga pani mibe laabo haruligonaga i̱ manga holebero.
6 Agali marume wali agali ko uruni mo ko howa minu baragola
tigua Anduane Homogonaga bi layago heneneoreda lo manda bulebira.
7 Agalime ira kambulalu dangialabaga biagadagua bialu
agali uruninaga kuni gingirulobaga buwa homali ngagoha waholebira.

8 Anduane Homogo Bibahende Haru Haame Ho Haga-o ^d
i̱na í̠hondo mini mbiraore wu haabo kogoni ndobe.
I̱na í̠ha ha do kogonigo i̱ nahome helabe.
9 Agali ko karume gono ngagoha i̱ do wuligo handayaho halu
í̠nime i̱ baya hangu pabe bu habe.
10 Agali ko uruni tininaga gono ngagoha tini do nga handala
i̱ poleberogoha mo pila holene mbira nawi howa
bayale yo pialu poliya helabe.